Rekord va pufak oralig‘ida: Anthropic IPOga qanday tayyorlanmoqda

​Anthropic tarixdagi eng yirik IPOlardan biriga aylanishi mumkin bo‘lgan ommaviy aksiyalar taklifiga tayyorgarlik ko‘rmoqda. Claude ortida turgan kompaniyaga investorlarning umidi katta. Biroq jadal muvaffaqiyat ortida butun AI sanoatiga bozor munosabatini o‘zgartirishi mumkin bo‘lgan xatarlar yashiringan.

Millionlardan milliardlargacha

26-oktyabr kuni Anthropic IPO bo‘yicha ro‘yxatdan o‘tish bayonnomasini AQSh Qimmatli qog‘ozlar va birjalar komissiyasiga (SEC) taqdim etdi. Kompaniya aksiyalarini Nasdaq’da ANT tickeri ostida joylashtirishni rejalashtirmoqda. Dastlabki hisob-kitoblarga ko‘ra, Anthropic qiymati $1,5 trilliondan $2 trilliongacha bo‘lishi mumkin, biroq taklifning yakuniy shartlari hali belgilanmagan.

X dagi postni ko‘rish Yuklanmoqda...

Tvitt muallif tomonidan o‘chirildi.

Lekin biz hamma narsani saqlab oldik 🙂.

Kompaniyaning moliyaviy natijalari bu yuqori kutilmalar sababini izohlaydi. Anthropic 2024-yilda atigi $386 million daromad olgan, bu ko‘rsatkich 2025-yilda $4,6 milliardga ko‘tarilgan va 2026-yilning birinchi yarmida $16,3 milliardga yetgan. Bu bir yil avvalgi davrga nisbatan qariyb 14 baravar o‘sishni anglatadi. 11 900 dan ortiq korporativ mijoz kompaniya mahsulotlariga yiliga kamida $100 000 sarflaydi, qariyb 250 mijozning har biri esa $10 milliondan ko‘proq mablag‘ sarflaydi. O‘sishning asosiy omillaridan biri Claude Code bo‘ldi: bu korxonalar dasturiy kod yozish va ishlab chiqish jarayonlarini avtomatlashtirishda foydalanadigan vosita.

Biroq bunday jadal o‘sish ulkan zararlar bilan birga kechdi. 2026-yilning birinchi yarmida Anthropic $80,7 milliard sof zarar ko‘rganini ma’lum qildi; shundan $72,4 milliardi naqd pulsiz buxgalteriya tuzatishlari, asosan moliyaviy majburiyatlarni qayta baholash bilan bog‘liq. Shu bilan birga, olti oylik davrda operatsion zarar bir yil avvalgi $2,1 milliarddan $693 milliongacha qisqardi.

Moliyaviy ko‘rsatkichlar yaxshilanayotganiga qaramay, Anthropic uchun kutilayotgan baholash juda yuqoriligicha qolmoqda. $1,5 trilliondan $2 trilliongacha bo‘lgan qiymat kompaniyaning 2026-yil ikkinchi choragi natijalari asosida yilliklashtirilgan daromadidan taxminan 33–43 baravar yuqori bo‘ladi. Bu Nvidia, Microsoft va Alphabet kabi texnologiya gigantlarining taqqoslanadigan baholash ko‘rsatkichlaridan ancha yuqori.

Yetakchilik narxi

Ilg‘or AI modellarini yaratish uchun ulkan hisoblash quvvati zarur. IPO hujjatlariga ko‘ra, Anthropic bulutli xizmatlar va infratuzilma uchun yuzlab milliard dollar miqdorida uzoq muddatli majburiyatlar olgan. Xususan, kompaniya 2036-yilgacha Amazon xizmatlariga kamida $110 milliard, Google infratuzilmasiga $115 milliard va 2033-yilgacha Microsoft hisoblash quvvatiga yana $45 milliard sarflashni rejalashtirmoqda.

X dagi postni ko‘rish Yuklanmoqda...

Tvitt muallif tomonidan o‘chirildi.

Lekin biz hamma narsani saqlab oldik 🙂.

Bundan tashqari, Anthropic SpaceX bilan 2029-yilgacha amal qiladigan $120 milliardlik bitim imzolagan. Uning texnologik hamkorlar oldidagi jami majburiyatlari $500 milliarddan oshadi. Bular bir martalik xarajatlar emas, balki hisoblash quvvatining mavjudligi va boshqa omillarga bog‘liq shartlarga ega, bir necha yilga mo‘ljallangan shartnomalardir.

Anthropic biznesining o‘ziga xos jihati — yirik texnologiya korporatsiyalari bilan yaqin aloqalaridir. Amazon, Google va Microsoft kompaniyaga nafaqat infratuzilma taqdim etadi, balki uning rivojlanishiga ham sarmoya kiritadi. Bundan tashqari, Anthropic’ning 2026-yil birinchi yarmidagi daromadining qariyb 48 foizi hamkorlarining bulutli platformalari orqali kelgan; bu platformalar Claude’dan foydalanish imkoniyatini o‘z mijozlariga sotadi.

Yana bir pufak yoqasida

Anthropic’ning ommaviy bozorga chiqishga intilishi AI sanoatining istiqboliga nisbatan shubhalar kuchayayotgan bir paytga to‘g‘ri keldi. Oktabrda CoreWeave va Nebius ma’lumotlar markazlari operatorlari aksiyalari qiymatining 30 foizdan ortig‘ini yo‘qotdi. Avstraliyaning Firmus kompaniyasi va SK Hynix sho‘ba korxonasi Solidigm rejalashtirilgan IPOlaridan voz kechdi. Investorlar texnologiya kompaniyalari infratuzilmaga kiritgan ulkan sarmoyalarini qaytara olish-olmasligidan tobora ko‘proq xavotirda.

X dagi postni ko‘rish Yuklanmoqda...

Tvitt muallif tomonidan o‘chirildi.

Lekin biz hamma narsani saqlab oldik 🙂.

Sapphire Ventures venchur kapital kompaniyasining hamkori Jai Das bugungi jo‘shqinlikni 1990-yillar oxiridagi telekommunikatsiya bumiga qiyosladi. O‘sha paytda kompaniyalar internet-trafik tez o‘sishiga umid qilib, optik tolali tarmoqlar qurishga katta mablag‘ sarflagan. Bu infratuzilma oxir-oqibat foydali bo‘lib chiqdi, biroq ko‘plab investorlar zarar ko‘rdi, ayrim kompaniyalar esa bankrot bo‘ldi.

Yana bir xavotir — Anthropic o‘sish sur’atining sekinlashuvi. The Information ma’lumotlariga ko‘ra, kompaniya daromadi 2026-yilning uchinchi choragida oldingi chorakka nisbatan 45 foizga oshgan, ikkinchi chorakda esa o‘sish 140 foizdan yuqori bo‘lgan. Shu bilan birga, OpenAI, Google va arzonroq AI modellari ishlab chiquvchilarining raqobati kuchaymoqda, bu esa Anthropic’ni narxlarni pasaytirishga majbur qilishi mumkin.

Taklif natijasi raqobatchilarning rejalariga ham ta’sir ko‘rsatishi mumkin. OpenAI ham o‘z IPOsiga tayyorgarlik ko‘rmoqda; u 2027-yilda kutilmoqda. FTV Capital boshqaruvchi hamkori Brad Bernstein Anthropic aksiyalarining birjadagi sust natijasi boshqa AI kompaniyalari baholarini qayta ko‘rib chiqishga turtki bo‘lishi mumkinligi haqida ogohlantirdi. Ayni paytda iyunda rekord darajadagi IPO orqali o‘nlab milliard dollar jalb qilgan SpaceX taklif hajmi keyinchalik aksiyalar narxi ko‘tarilishini kafolatlamasligini ko‘rsatmoqda: oktabr oxiriga kelib, uning aksiyalari birinchi kunidagi ochilish narxidan biroz past darajada savdo qilayotgan edi.

Muvaffaqiyat yoki umidsizlik

Anthropic daromadining jadal o‘sishi uning mahsulotlariga talab kuchliligini tasdiqlaydi, ammo barqaror daromadlilikni hali kafolatlamaydi. Korporativ mijozlar talabi susaysa yoki raqobat narxlarni tushirsa, hisoblash infratuzilmasi yetkazib beruvchilari bilan tuzilgan ko‘p yillik majburiyatlar jiddiy moliyaviy yuk bo‘lib qolishi mumkin.

Hatto muvaffaqiyatli IPO ham Anthropic aksiyalari narxining keyinchalik oshishini kafolatlamaydi. $1,5 trilliondan $2 trilliongacha bo‘lgan baholash kompaniyaning ko‘p yillar davomida yuqori o‘sish sur’atlarini saqlab qolishini allaqachon nazarda tutadi. Kutilmalardan ozgina ortda qolishning o‘zi ham investorlarni hafsalasini pir qilishi va OpenAI’ni ham qo‘shgan holda boshqa AI kompaniyalari baholarini qayta ko‘rib chiqishga olib kelishi mumkin.