Tom Lining Ethereum’ga tikkan milliardlari: nega u kriptovalyuta bozorida yana yuksalish kutmoqda

​Tom Li yillar davomida Uoll-stritdagi eng ashaddiy kriptovalyuta tarafdorlaridan biri sifatida Bitcoin’ni qo‘llab-quvvatladi. Endi u o‘zining Bitmine kompaniyasi orqali Ethereum’ga milliardlab dollar tikmoqda. Uni e’tiborini o‘zgartirishga nima undadi va strategiyasi samara beradimi?

Bitmine Ethereum’ga egalik qilish maqsadiga yaqinlashmoqda

Bitmine Immersion Technologies hozir 6,07 milliondan ortiq ETH’ga egalik qilmoqda, bu Ethereum’ning muomaladagi taklifining 4,97 foiziga teng. Kompaniya 9-noyabr kuni 9 587 ETH sotib olganini ma’lum qildi va shu tariqa egalik qilish maqsadiga yaqinlashdi. Kompaniya bildirgan ETH’ning 2 234 dollarlik narxiga ko‘ra, uning aktivlari taxminan 13,6 milliard dollarga baholangan.

X dagi postni ko‘rish Yuklanmoqda...

Tvitt muallif tomonidan o‘chirildi.

Lekin biz hamma narsani saqlab oldik 🙂.

Bitmine 5,23 millionga yaqin ETH’ni steykingga qo‘ygan va Ethereum’ning proof-of-stake tizimi orqali qo‘shimcha tokenlar ishlab topmoqda. Kompaniya barcha aktivlarini steykingga qo‘yish yiliga taxminan 359 million dollar miqdorida mukofot keltirishi mumkinligini hisoblaydi, biroq haqiqiy daromad tarmoq sharoitlari va ETH narxiga bog‘liq.

Bitmine raisi Tom Li Ethereum hammuassisi Vitalik Buterinning yaqinda ETH’ni qiymat saqlash vositasi deb ta’riflagan fikrlarini ham olqishladi. U bu bayonotni “keskin burilish” deb atab, Ethereum tokenizatsiya va sun’iy intellekt rivoji bilan keladigan investitsiya yuksalishidan qanday foyda ko‘rishi mumkinligini aniq ko‘rsatganini ta’kidladi.

Tom Li Bitcoin’ning eng yirik tarafdorlaridan biriga qanday aylandi

Fundstrat moliyaviy tadqiqotlar kompaniyasining hammuassisi Li Uoll-stritda Bitcoin’ni qo‘llab-quvvatlagan ilk taniqli strateglardan biri edi. U 2017-yilda, kriptovalyuta taxminan 1 000 dollar turgan paytda, mijozlarga BTC’ni tavsiya qila boshladi va dadil narx prognozlari bilan tanildi.

Uning ishonchi bozorning qayta-qayta qulashlariga qaramay saqlanib qoldi. Li Bitcoin taklifining cheklanganligi va undan foydalanish kengayib borayotganini uzoq muddatda narx oshishini kutish uchun asos deb bildi, garchi qisqa muddatli o‘zgaruvchanlik uning prognozlarini tez-tez shubha ostiga qo‘ygan bo‘lsa ham. Ayrim prognozlari haddan tashqari optimistik bo‘lib chiqdi, biroq u kriptovalyutalarning eng taniqli institutsional tarafdorlaridan biri bo‘lib qoldi.

E’tiborini Ethereum’ga qaratganidan keyin ham Li Bitcoin istiqbollarini himoya qilishda davom etdi. O‘tgan yili Korea Blockchain Week anjumanida u “Men Bitcoin’ga hali ham ishonaman”, deb, BTC o‘sha yil oxirigacha 200 000–250 000 dollarga yetishi mumkinligini prognoz qildi. Bu prognoz amalga oshmadi va uning uzoq muddatli ishonchi bilan qisqa muddatli narx kutilmalari o‘rtasida tafovut bo‘lishi mumkinligini ko‘rsatdi.

Li nega e’tiborini Ethereum’ga qaratdi

Lining Ethereum ’ga qiziqishi ortib borishi uning blokcheyn texnologiyasi kriptovalyuta savdosidan tashqariga chiqib, an’anaviy moliya sohasiga kirib borayotgani haqidagi qarashini aks ettirdi. Banklar va aktivlarni boshqaruvchi kompaniyalar steyblkoinlar, tokenizatsiya qilingan qimmatli qog‘ozlar hamda blokcheyn asosidagi hisob-kitoblarni o‘rganayotgan edi. Bu xizmatlarni qo‘llab-quvvatlay oladigan tarmoqlar uchun yangi imkoniyatlar yaratdi.

2025-yil iyunida Li ilgari Bitcoin mayningi va immersion-sovutish texnologiyasiga e’tibor qaratgan Bitmine kompaniyasi raisi bo‘ldi. Kompaniya Ethereum xazina strategiyasini moliyalashtirish uchun 250 million dollarlik xususiy joylashtirishni e’lon qildi. Bir necha hafta ichida uning ETH zaxirasi taxminan 1 milliard dollarga yetib, biznes tubdan o‘zgardi.

Li Ethereum’ning betarafligi uni moliya institutlari uchun ayniqsa jozibador qilishini ta’kidladi. Korea Blockchain Week anjumanida u Ethereum’ni “haqiqatan ham betaraf blokcheyn” deb atab, shunday dedi: “Uoll-strit qanday ishlashini hisobga olsangiz, ular faqat betaraf blokcheynda ishlashni va faoliyat yuritishni istaydi.”

Li Ethereum supertsikliga tikmoqda

Li Ethereum Bitcoin’ning avvalgi yuksalishiga qiyoslanadigan uzoq davom etuvchi o‘sish davrini boshdan kechirishi mumkin, deb hisoblaydi. Uning supertsikl haqidagi qarashi blokcheyn texnologiyasi global moliyaviy infratuzilmaning ajralmas qismiga aylanishi va Ethereum uning asosiy tarmoqlaridan biri bo‘lib chiqishi kutilishiga asoslangan.

Sun’iy intellekt ham uning investitsiya tezisining bir qismidir. Li avtonom AI agentlari va robotlar blokcheyn tarmoqlari orqali tranzaksiyalarni amalga oshirishi va qiymat almashishi kutilayotganini aytmoqda. Uning fikricha, Ethereum bu yangi iqtisodiyotdan foyda ko‘rishi mumkin, ammo bunday o‘zlashtirishning ko‘lami va muddati hozircha noaniq.

Uning so‘nggi izohlari ETH qiymati qanday shakllanishi haqidagi qarashlari o‘zgarganini ham ko‘rsatadi. Buterinning bayonotlaridan so‘ng Li ETH’ni tranzaksiya komissiyalaridan olinadigan daromadga bog‘liq investitsion jozibadorligi bor token emas, balki “ishonchli va sifatli garov aktivi” deb ta’rifladi. Uning fikricha, institutlar Ethereum infratuzilmasidan foydalanish bilan birga ETH’ni moliyaviy aktiv sifatida ham tobora ko‘proq saqlashi mumkin.

Biroq blokcheynning kengroq joriy etilishi ETH’ga talab oshishini o‘z-o‘zidan kafolatlamaydi. Ikkinchi qatlam tarmoqlari tranzaksiya xarajatlarini kamaytiradi, moliya institutlari esa katta miqdorda token jamg‘armasdan Ethereum asosidagi ilovalardan foydalanishi mumkin. Investitsiya tezisi qisman ETH shunchaki foydalaniladigan token emas, balki institutlar saqlashni istaydigan aktivga aylanishiga bog‘liq.

Bitmine’ning Ethereum strategiyasi o‘zini oqlaydimi?

Bitmine 2026-yil mart oyida ishga tushirilgan, institutsional mijozlar uchun mo‘ljallangan Ethereum steyking platformasi MAVAN orqali ham biznesini kengaytirmoqda. Dastlab kompaniyaning o‘z aktivlari uchun ishlab chiqilgan platforma endi institutsional investorlarga, aktivlarni saqlovchilarga va boshqa hamkorlarga ham xizmat ko‘rsatmoqda. Bu Bitmine’ga faqat xazinasidagi aktivlar qiymatiga tayanmay, Ethereum infratuzilmasi atrofida biznes qurish imkonini berishi mumkin.

Kompaniya strategiyasi allaqachon jiddiy sinovdan o‘tdi. 2026-yil fevralida Li Bitmine’ning milliardlab dollarlik qog‘ozdagi zararlarini tanqid qilganlarga javob berib, bunday pasayishlar uzoq muddatli xazina strategiyasining “nuqsoni emas, balki xususiyati” ekanini ta’kidladi. Uning javobi Bitmine bilan odatiy operatsion biznes o‘rtasidagi muhim farqni ko‘rsatdi: kompaniyaning moliyaviy natijalari ETH narxiga chambarchas bog‘liq.

Keyingi vazifa Ethereum sotib olishdan ko‘ra, Bitmine allaqachon egalik qilayotgan aktivlarni boshqarish bilan bog‘liq bo‘lishi mumkin. Oktabr oyida Token2049 konferensiyasida Li kompaniya tez orada faol xaridlarni to‘xtatishini tasdiqladi. “Bu qat’iy chegara. Biz 5 foizdan ortiq to‘plamaymiz”, dedi u.

Bu marraga yaqinlashar ekan, Bitmine’ning kelajagi nafaqat Li bashorat qilgan Ethereum supertsikli ro‘yobga chiqishiga, balki kompaniya katta miqdordagi aktivlarini aksiyadorlar uchun uzoq muddatli qiymatga aylantira olishiga ham bog‘liq bo‘ladi.